سياسة الضرب على القفة

معلهش يمكن العنوان صادم حبتين ، بس ، هي دي الحقيقة .
اللي بيحصل في مصر اليومين دول بيأكد إننا ببنضرب على قفانا ومش بالإيد - لأ - بالجزمة .
أكيد كلنا تابعنا اللي حصل في المحلة، وشفنا أد إيه بقينا نهان في بلدنا ، الحقيقة أن اتصدمت لما شفتالصور اللي نتاقلتها وكالات الأنباء والصحف ( غير الحكومية طبعاً ) وافتكرت إن فيه مجزرة جديدة في غزة أو العراق ، ولكن ، اكتشفت إن الكلام ده في مصر .
فين منظمات حقوق الإنسان العالمية والمحلية ؟ فين راعية الإرهاب ( أقصد الديموقراطية ) الأولى في العالم ماما أمريكا ؟ فين الناس ؟ إحنا فين ؟ اتخرسنا ليه وبقنا اتفقل بقفل ومفتاحه ضاع ؟ للدرجة دي هنا على نفسنا وكرامتنا هانت علينا ؟ ولا خلاص اتعودنا على الذل ؟ اتعودنا على الضرب والسب والتعذيب ؟ الأمور أصبحت عادية جداً المئات كل يوم يدخلوا المعتقلات ويا عالم بيطلعوا منها ولا إنسى يا عمرو ؟ ولو بيطلعوا منها حالهم إيه ؟ يا ترى عندهم أمراض نفسية من اللي شافوه جوة ؟ ولا عندهم دوافع الانتقام وكره المجتمع ويتحولوا لإرهابيين بجد ؟ أفتكر قصة حقيقية حصلت من حوالي 11 سنة كان فيد مدرس غلبان قوي ماشي جوة الحيط مش جنبه ومتزوج وقروي ساذج جداً وفي حاله ، المهم ، جاله زوار الفجر في يوم وأخدوه وهات يا ضرب وإهانات وتعذيب على الرغم من إنه برئ وسابوه بعد ما انتهكوا كرامته وطلع شخص تاني ... باع الجاموسة اللي حيلته واشترى سلاح آلي وبدأ ينتقم من اللي عملوا فيه كدة وتحول لأخطر إرهابي في المحافظة التابع لها وقتل الكثير من زبانية التعذيب واستمرت مطاردته عدة سنوات حتى لقي مصرعه .
القصة دي حقيقية وهي مثال بسيط على اللي ممكن يحصل لو فضل الوضع على ما هو عليه .
وأنا مش بدعوا لحاجة زي كدة بس بقول كلمة واحدة للحكومة: حرام نتهان بفلوسنا يعني إحنا ندفع الضرايب من دمنا ودم أولادنا وهما ياخدوا مرتباتهم علشان يذلونا ويبهدلونا ؟ والله حرام

سعدسعد يحيا سعد

ايه يا عم الكلام الجامد ده